Litteræ P., subprioris Sancti Martini de Campis, ad Stephanum, abbatem Cluniacensem, cui nuntiat electionem B., prioris Sancti Martini, in abbatem Latiniacensem.
Reverentissimo patri nostro ac domino Stephano, Dei gratia Clunia
censi abbati, frater P., supprior Sancti Martini de Campis Parisiensis, totusque ejusdem loci conventus, salutem et devotam obedientiam usque ad mortem. Intelleximus sane, quod dolentes referimus, quod conventus Latiniacensis venerabilem et karissimum B., priorem nostrum ac dominum, unanimiter et concorditer in abbatem suum elegit. Cum igitur paternitati vestræ satis constet ad liquidum et etiam sit omnibus aliis manifestum, quod per probatam et expertam providentiam prenominati prioris nostri ecclesia Sancti Martini in spiritualibus et in temporalibus multiplex per Dei adjutorium incrementum fuerit assecuta, et ex ejus amotione (quod absit!) grave dampnum ipsa ecclesia incurreret, in eisdem paternitatem vestram quantacumque possumus devotione rogamus et requirimus humiliter ex affectu, quatinus devotissimis filiorum vestrorum precibus inclinati præfatum priorem nostrum efficaciter inducere velitis ad recusandum electionem prædictam, ne dicta ecclesia Sancti Martini, quam inter ceteras Cluniacensis ordinis ecclesias specialius diligere et confovere tenemini, pastore suo idoneo ac pernecessario remaneat viduata, qui negotia ecclesiæ Cluniacensis et nostræ promovere fideliter ac feliciter consuevit, et tantum inde faciatis, si placet, ut Deus omnipotens vobis retribuat ad salutem, nosque pro vobis orare devotius teneamur. Valeat bene et diu pia paternitas vestra.